వసుమతి - శ్రీ గౌరి

**************వసుమతి**********
శ్రీ గౌరి గుడిలో
నే గంట శృతినై 
రాగాల ధ్వనిలో
దాగున్న మదితో (1)
నా పద్య పదముల్
ఆ పార్వ తమతో
నే పంచుకొనగా
నా పల్కు లివియే (2)
"నీ ముందు బుడమిన్
నా మేను మొదలై
నీ మీద బగితిన్
నా మేను కొసఁగెన్ (3)
నీ ప్రాంగణములో
నే ప్రాఁకు దినముల్
నీ ప్రార్థనలతో
నా ప్రాయమెదిగెన్  (4)
ఈశుండు కళతో
ఆ శాంకరునితో
ఆశాజనకమున్
నీ శక్తి దెలిసెన్  (5)
నీ పాట స్వరముల్
నా పొద్దుపొడుపున్
లేపంగ మొదలౌ
నా పుణ్యఫలమై  (5)
అందాల పురమున్
బంధాల ముడితో
గంధాల పసిలో
సంధించితినిగా  (6)
ఏ పూర్వ పునెమున్
ఏ పాటి వరమున్
నీ పంచ బతుకున్
నే పొందెనిటులన్"   (7)
************************
మేను1 =జన్మము,మేను2=శరీరము
శాంకరుఁడు = వినాయకుడు

వసుమతి
వృత్తం రకానికి చెందినది
గాయత్రి ఛందమునకు చెందిన 29 వ వృత్తము.
6 అక్షరములు ఉండును.
9 మాత్రలు ఉండును.
మాత్రా శ్రేణి: U U I - I I U
4 పాదములు ఉండును.
ప్రాస నియమం కలదు
ప్రతి పాదమునందు త , స గణములుండును.