తెలుగు వాడి ననుచు పలుకరా ఈరోజు
తెలుగు భాషనుండు తియ్యదనము
తెలుగు నేర్పి జూపి తెలుపరా, నీ విధి
తెలుగు జాతి కొరకు వెలుగు నిలిపి (1)
తాతదండ్రులందు దాగిన సొత్తురా
అమ్మ బామ్మలందు నాత్మ కలిగి,
భాషలోని తలపు భవితలో జూపుచు
బాధ్యతయని తెలిసి పంచు కొనుము (2)
నెల్లలోకమందు నెందు కాలెడి యున్న
తెలుగు వారి సొత్తు తెనుగు వ్యాప్తి,
కెల్లరందు నున్న పిల్లలందరు నేడు
తెలుగు నేర్చినంత కలుగు తృప్తి! (3)
తే.గీ. సమర సాహిత్య సంగీత సారమందు
విజయభేరిని భాస్కర రచన గాంచి
ఉల్ల మందున ఉత్సాహమెల్ల జూపు
గాన మాధుర్యమును గొల్పు కలము గాద !
ఆంధ్ర పౌరులై!
ఉత్పలమాలలు
నేనొక రోజు
చిత్తమున నిచ్చెలగా పరిశీలనాత్మమున్
దేనిని బొందడానికని
దీరములన్నియు దాటివచ్చి, యా
కానని బుణ్యభూమియెడ కమ్మని బ్రేమను బంచునంచు, నే
వానిని గుర్తుచేసుకొను
భాగ్యము నిప్పుడు పద్యమల్లికన్ ! (1)
ఊరును వీడి,
యున్నతము నోర్పుగ యుక్తిని దోడ నేర్చుచున్
వీరులు వీరు
నభ్యుదయ వీక్షణ గాంచగ విశ్వ వ్యాప్తికై
చేరి ప్రవాస
జీవితము శ్రేయముగా గనువిందు గాంచుచున్
పేరును బెంచుచున్,
తెలుగు బిడ్డలు, నెంతటి బాట లేయునో! (2)
కష్టములెన్నియున్న
తన కార్యపు దీక్షను బెంచి జూపుచున్
సృష్టిని సాధనాయుతపు
వృద్ధిని బుద్ధిని పొందుపర్చుచున్
ఇష్టముజేసి
నేర్పులను శిక్షణ బొందుచు ముందుజూపుతో
స్పష్టత జూపి
కార్యమును సాధన నిల్పెను, యాంధ్ర పౌరులై! (3)
తాతలు లేరు
నేర్పుటకు, దండ్రుల సంపదలెల్ల లేకనే
చేతురు కాయకష్టములు,
స్నేహపు భావము స్వీకరించుచున్
భీతిని వీడి
సాగినను బింబము జూపెడు రోజుకోరుచున్
జాతికి వీరు
నాద్యులగు, సంస్కృతి నేర్పుచు నెల్లలోకమున్ (4)
పెంచిన ప్రేమ
నిల్పుకొని పెద్దల సుద్దుల బాటనడ్చుచున్
వంచనలెన్నియున్న
తమపంచన జేర్చక నిష్టబుద్ధితో
అంచల నంచలన్
నిలిపి అందని దేమని నెక్కిచూపుచున్
మంచి ప్రవాస
ఆంధ్రులని మాటలతో మనపేరునిల్పెరా! (5)
అంతట నాగి ఉండుటయె గాక తరాలగురించి తోచుచున్
అందరు తెల్గునేర్వవలెనంచు
స్వభాషను సత్కరించిచున్
అందరునొక్కరై
బడులు బాధ్యతతో నెలకొల్పి నేర్పగన్,
అంతట ఆంగ్లమాంధ్రములు
ఆశల బాసలు తీర్చు భాషలౌ! (6)
పోరుకు సిద్దమందురట
భూతలమందున నెట్టిరంగమున్
భారతదేశపౌరులయి
బాధ్యతతోడను దౌత్యవేత్తగా
వేరొకదేశ సంపదలు
విస్తృతరీతిని విస్తరించుచున్
వారి ప్రశంసలందుకొను
వారసులందరు నేమి భాగ్యమో! (7)
సాహితి సాంప్రదాయములు
చక్కటి చిక్కటి నాట్యగానముల్
ఊహకు మించి
చూపగల శోభలనన్నియుఁ సంతరించుచున్
తాహతకొద్ది
సాయపడి దాతగనాదుచు పుణ్యభూమికై
దోహదమైన కార్యములు
దోడ్డగజేయుచు చాటుచుండిరే! (8)
కొందరు సాఫ్టువేరులను
కోరుచు నెక్కెన గద్దెలెన్నియో
కొందరు వైద్యవృత్తులను
కోరుచు మిక్కిలి శక్తివంతులౌ
కొందరు నాయకత్వమును
కోరుచు చెక్కిన సంస్థలెన్నియో
కొందరు నెందరో!
తెలుగు కూనలు మక్కువతోడ చేరికౌ! (9)
ఛందములోన నందమును జాతిని నెప్పుడు మేలుకొల్పగా
బంధములన్ని
కూర్చుకుని పచ్చని జీవనమెంచుచుండగా
అందరువేయు ముందడుగు
పౌరుని తీరుని, వృద్ధి జూపగా
వందనముల్ ప్రవాసులకు,
వారథి వీరులకెల్ల నెల్లడున్! (10)
మల్లేశ్వరరావు పొలిమేర
ట్రోఫీ క్లబ్ , డల్లాస్
05.15.2025
ఈ రోజు మన గురువుల ధ్యేయానిరతిని చూస్తూ ...
ఆటవెలదులలో ..
చెప్పదలచినాను చిన్నమాట నయన
ఎంతగొప్ప గురువులందరికడ
బాలలందు తాము బంధమ్ము ముడివడి
చెంత జేరవచ్చె నంత కలసి (1)
తల్లిదండ్రులంత అల్లగురువులంత
తెలుగుతల్లి యందు పలుకులిడుచు
బాధ్యతాయుతమ్ము పంచుకున్న తలపు
అందిపుచ్చుకున్న ఆత్మబలము (2)
నేర్చుకొనుట కన్న నేర్పుట కష్టమ్ము
బాలలందు నోర్పు బహుళ గాద
సంకటములు దాటి సంస్కృతిని నిలిపి
సంస్కరించు మీకు వందనాలు (3)
పొద్దు పొడిసి నేడు నిద్దుర వీడుచు
కొత్త వత్సరమని కోరు టేల,
మంచి తలపులన్ని మదిలోన పూయుచు
కొత్త లోకములకు విత్తు వేయు (1)
నేను నాది యనక నెయ్యము చేకూర్చి
కొత్త బంధములను కూర్పుకొనుచు
మాటసాయమిచ్చి మానవత్వముతోడ
కొత్త లోకములకు విత్తు వేయు (2)
తాతను పట్టుకు తారాడే నే
చేతిని వీడక చేదోడై నే
పోతిని వెంటన బుట్టంగా నే,
తాతను ప్రేమము దాచేదేనా! (1)
పిల్లలు బెంచుచు ప్రేమించే తా
నుల్లము నందున నుయ్యాలూపే
ఎల్లలు దాటిన నీరోజేమో
అల్లది భారమ నాలోచించే! (2)
సాధ్యత నేమది సందేహమ్మా!
భాద్యత జూపుచు భారమ్మైనన్
ఆద్యుఁడుతానయి ఆశాజ్యోతిన్
విద్యలు నేర్పుచు ప్రేరేపించెన్ (3)
కష్టములన్నవి కావేరోజూ
ఇష్టము చేయుచు నేర్వంగా యీ
సృష్టికి బాటలు సేద్యంతో నీ
దృష్టిని మల్చుము తృష్ణేదైనా (4)
యుక్తిని బెంచుచు యుద్ధాలెన్నో
శక్తికి మించిన సాధించొచ్చోయ్
భక్తిని నేర్చిన బాధ్యత్వమ్మున్
ముక్తిని మీటెద ముందస్తుండై (5)
పేదరికమ్మును పీల్చేగాలిన్
బాధలనన్నియు బంధించంగా
వేదనగమ్ముచు వీచేగాలిన్
శోధనలెట్లని సూచించంగా (6)
ఆ హనుమంతుని పాఠాలెన్నో
ఊహనునుంచుచు శోధించంగా
సాహస జీవత సాఫల్యమ్ముల్
దోహదమైనవి దూరాలోచన్ (7)
రానిది యేమని ప్రారంభిస్తే
కానిది యేమని కాస్తోకూస్తో
మానక నేర్వని మాటందిస్తే
కానద గెల్పును కార్యార్థమ్మున్ (8)
***************************************************
