కరోనా

*******************తాండవజవ *******************

వడిగా మనుషులను వలచి వచ్చినది కరోనా

సడియే తెలుపక కదిలెను, జాగరము సరేనా  

మడిగా కరములను కడిగి మాన్పుటయె భరోసా

జడుపే వలదుమరి, నడక సాధ్యమగు మరోలా (1)   

మనలో మనకు ఎడములిడి మార్చగలుగు సుస్తీ,

కనరాని కలతలిడుచుచు కార్యములను కుస్తీ 

తనవారిని కలుపుకొనెడు దారెరగని బస్తీ ,

వినరే! విలువలు తరిగిన విశ్వపు ధనరాసూల్ (2) 

పనిలో పనియని నెదుగుచు స్వార్ధపు పలు శక్తుల్ 

శనిలా తగులుకొను, నెదురు సాహసముల తోడన్

కొనియాడదగునె పలుగురు కోరితలచు సేవల్  

అనివార్యమయినను తగునె జాతికి మన స్వస్తిల్ (3)  

***********************************************

జాగరము = మేలుకొను

స్వస్తి = ఆశీర్వాదము

తాండవజవ పద్య లక్షణములు

• వృత్తం రకానికి చెందినది
• ధృతి ఛందమునకు చెందిన 63484 వ వృత్తము.
• 18 అక్షరములు ఉండును.
• 22 మాత్రలు ఉండును.
• మాత్రా శ్రేణి: I I U - I I I - I I I - I I U - I I I - I U U
• 4 పాదములు ఉండును.
• ప్రాస నియమం కలదు
• ప్రతి పాదమునందు 12 వ అక్షరము యతి స్థానము
• ప్రతి పాదమునందు స , న , న , స , న , య గణములుండును.

మల్లేశ్వరరావు పొలిమేర 03.14.2020

సుప్రభ గారి పద్యములు 

శుభంబౌ...

-----------------

*

తాండవజవ వృత్తము 

*

గణములు -స,న,న,స,న,య

యతి- 12వ అక్షరము  

*

సరిపోలరు పరులెవరును సత్యముగను నీతో 

నరుదెంచితి విటుల ధరకు నబ్బురమవ నెంతో  

వెఱపొందుటె సకలజనులు వేపుదువని వారిన్ 

కరుణంగని వదలఁదగును గైకొని యివి జోతల్ 

*

మఱియాదనుఁ గనరెవరును మారివవ కరోనా 

కరుణామయులను, ఘనులనె కాంచఁగలరు ప్రీతిన్ 

పరికించవ ప్రజలిలపయిఁ బర్గులిడుట భీతిన్

దరిఁజేరరు చెలులయిననుఁ దాకుననుచు వ్యాధుల్

*

మఱిరాకిఁక యిటువయిపుకు మాపయిఁ గృపతోడన్  

ధరణీస్థలి వ్యధితమవఁగ తాపమిడుట మేలే 

గురువాక్యము చెవినిడుచును గోరి తెలిపినానే 

గురుతించుచుఁ దన గరిమను గోలనిడక పోవే 

*

కరచాలనముల విడిచిరి కల్గిన గిలి తోడన్

అరుదెంచరు బయలుకయిన నాటనలరు బాలల్ 

పరుగెత్తరు చెలిమి గదురఁ బ్రక్క గృహము కైనన్

చిఱునవ్వులు విరియఁగలవ చేరఁగ వలదన్నన్ 

*

హఠమున్ సలిపియు ననువవదానతులను మీఱన్

పఠియింపఁగ వలనవదయెఁ బాఠములును స్కూళ్ళన్ 

విఠలుండిఁక నలుగఁగలఁడు పృథ్విజనుల వేపన్ 

శఠమున్ గనబరచక వడి జాఱుటయె శుభంబౌ   

*

సుప్రభ 

2:50 PM 

03-14-2020

*

ఈ రోజు మల్లేశ్వరరావు గారు పరిచయము చేసిన క్రొత్తవృత్తము.

వారికి ధన్యవాదములు.

*

నవవృత్తము గొని యలరుచు నాతలికడ కేఁగన్

భువనేశియుఁ గలముఁ గదిపి ముందుకు నడుపంగా

నవతీర్ణమగు తలఁపులవి యక్షరములు గాఁగా

శివసుందరికిఁ బ్రణతులిడి చేసితి రచనమ్మున్