తెలుగు భాషా దినోత్సవ శుభాకాంక్షలు -2025

ఒకమాట చెప్పుటకు ఓర్పుతోడ నే

నొక పద్యమెందుకని చూచుచుండగా

ఇక భాషగా తెలుగు ఇంపులెన్నియో

సకలమ్ము చూపెదని చాటుకొందునే (1)

అదికాద ఆంధ్రులకు అందమిచ్చుచూ

పదిమంది గౌరవము పంచునెప్పుడూ,

మదిదోచు మాటలను మంచికోరుచూ

కదిలించునే తెలుగు గాథలెన్నియో (2)

అటుచూడు పామరులు పాడుచుండిరే

ఇటుచూడు పండితులు విద్య జూపగా

చిటుకేసి చాటువులు చెప్పుచుండిరే

కిటుకేమిరా? తెనుగు కీర్తి జూపగా (3)

అలవోకగా చిలుకు హాస్యమెంతయో

పలికించిరే గిడుగు బాటవేయుచూ

ఉలికించిరే తెలుగు బోధనమ్ములో

విలువైన సంపదని పేరు నిల్పెరా (4)

మల్లేశ్వరరావు పొలిమేర

ట్రోఫీ క్లబ్ , డల్లాస్

08.29.2025

కనకప్రభ పద్య లక్షణములు

ఈ పద్య ఛందస్సుకే మంజుభాషిణి , జయా , నందినీ , ప్రబోధితా , మనోవతీ , విలంబితా , సునందినీ , సుమంగలీ అనే ఇతర నామములు కూడా కలవు.
వృత్తం రకానికి చెందినది
అతిజగతి ఛందమునకు చెందిన 2796 వ వృత్తము.
13 అక్షరములు ఉండును.
18 మాత్రలు ఉండును.
మాత్రా శ్రేణి: I I U - I U I - I I U - I U I - U
- చతుర్మాత్రా శ్రేణి: I I U - I U I - I I U - I U I - U
- పంచమాత్రా శ్రేణి: I I U I - U I I I - U I U - I U
- మిశ్రగతి శ్రేణి (5-3) : I I U I - U I - I I U I - U I - U
- మిశ్రగతి శ్రేణి (4-5) : I I U - I U I I - I U I - U I U
4 పాదములు ఉండును.
ప్రాస నియమం కలదు
ప్రతి పాదమునందు 9 వ అక్షరము యతి స్థానము
ప్రతి పాదమునందు స , జ , స , జ , గ గణములుండును.